Џудо федерацијата почнува проект „Џудо во училиштата“

Џудо федерацијата на  Македонија, во соработка со Светската џудо федерација, оваа година ќе започне со реализација на проектот ,,Џудо во училиштата“.

По тој повод Светската џудо федерација ќе донира 10 борилишта (татами), 50 џудо кимона за учениците, како и финансиски средства во висина од 500 американски долари, како хонорар за реализаторите на овој проект.

Бидејќи се работи за многу важен проект, Федерацијата ги поканува сите заинтересирани да се пријават на конкурсот за да може проектот да се реализира по највисоки стандарди. Притоа треба да се почитуваат условите пропишани во конкурсот со цел за рамномерен развој на џудо спортот на територија на целата држава.

ИЗВЕСТУВАЊЕ СО КОНКУРС ЗА УЧЕСТВО ВО ПРОЕКТОТ

ПИСМО ЗА НАМЕРИ

Членови на ЏК „Сеишин“ меѓу најдобрите на изборот на спортист на Прилеп за 2019 година

На 07. февруари се одржа манифестацијата за прогласување на најдобри спортисти, клубови, тренери и спортски работници за 2019 година во општина Прилеп.


На оваа манифестација членката на ЏК „Сеишин“, Теодора Димеска се најде меѓу десетте најдобри спортисти во сениорска конкуренција, додека главниот тренер на клубот, Дејан Мицкоски беше прогласен за најдобар  тренер за 2019 година.

Мицкоски пред својот стручен тим и клупските колеги соопшти дека добиената плакета ја споделува со останатите колеги од тимот тренери  кои имаат  заеднички заслуги за успесите во изминатата година. Признанието ќе ја краси клупската канцеларија, заедно со другите одличја и награди.

Битолчанецот Ѓуро Илиќ доби највисоко мајсторско звање

Битолчанецот Ѓуро Илиќ, тренер и член на ЏК „Пелистер“ е промовиран во џудо мајстор шести ДАН, со што се стекна со највисоко мајсторско звање во нашата држава.

Промоцијата на звањето на Илиќ беше направена на полагањето за мајсторски појаси што во Белград го организираше Џудо сојузот на Србија, а го  оценуваше стручен ДАН колегиум предводен од д-р Славко Обадов.

Според Илиќ, добивањето на високото мајсторско звање требало да се случи многу порано, но поради обврски било одложувано.

Се работи за големо признание за неговата досегашна работа како тренер и основач на повеќе џудо клубови во Македонија, но истовремено е и голема придобивка за нашата Џудо федерација.

Во Прилеп се одржа заеднички тренинг за четири џудо клубови

По иницијатива на ЏК „Пролетер“ од Прилеп, а во координација со спортскиот директор, м-р Ѓоре Мирчески и членот на Стручниот совет, Александар Ѓорѓиоски, на 14. февруари во Прилеп се одржа заеднички отворен тренинг.

Околу шеесетина џудисти од скоро сите возрасни категории од џудо клубовите „Пролетер“ и „Сеишин“ од Прилеп, „Преспа“ од Ресен, како и од „Кожувчанка“ од Кавадарци имаа несекојдневно спортско дружење и се стекнаа со нови натпреварувачки искуства за време на тренингот што го водеше проф. Славе Димитриоски.

Позитивните импресии од тренингот беа очигледни, сликовито пренесени со јасно изразени насмевки на изморените лица на џудистите и тренерите.

Практикувањето на ваквите заеднички тренинзи на џудо клубовите од државата, Џудо федерацијата го поздравува и се надева дека во иднина ќе премине во пракса со иницијатива на самите клубови, се до започнување и имплементирање на проектот „Хаџиме 2020 “.

 

Во Битола се одржа полагањето за ДАН и КЈУ појаси

Во саботата, на 8 февруари, во организација на ДАН комисијата при Џудо федерацијата на Македонија, а со техничка поддршка од џудо клубот „Пелистер“ од Битола,  се одржа полагање за 1 КЈУ кафеав појас- кандидат мајсторски  и за 1 ДАН црн појас – мајсторски.

Полагањето го спроведе комисијата во чиј состав беа Ѓуро Илиќ, како претседател и Дејан Мицкоски и Нада Ристов, како членови.

На полагањето беа пријавени вкупно 13 кандидати, од кои 6 за 1 КЈУ појас и 7 кандидати за 1 ДАН појас.

По спроведувањето на полагањето, Комисијата донесе одлука и ги објави имињата на кандидатите кои положиле за соодветните појаси:

1 ДАН

  1. Јорданчо Ѓорѓиоски
  2. Благојче Митрески
  3. Марин Билјановски
  4. Борче Ангелов
  5. Трајче Марков
  6. Омер Сулејмани
  7. Дурим Шаќири

1 КЈУ 

  1. Бојан Синадиноски
  2. Андреј Вељаноски
  3. Христијан Глигороски
  4. Андреј Чакаровски
  5. Марио Нелоски
  6. Резарт Хусени

Во Прилеп се одржа семинар за тренери и судии

На 25 и 26 јануари во Прилеп се одржа стручен семинар за џудо тренери и џудо судии, за обновување на лиценците за натпреварувачката 2020 година.

Организатор на настанот беше Џудо федерацијата на Македонија.

Семинарот го водеа, Светозар Отиќ, интернационален судија и Владан Гачиќ, тренер и интернационален судија, и двајцата од Србија.

На овој семинар учествуваа околу 50 спортски работници – тренери и судии од сите клубови кои се  членки на Федерацијата.

 

Известување за полагање за појаси

Согласно усвоениот план и програма за работа на ДАН комисијата, ве известуваме дека полагањето за 1 КЈУ, 1 и 2  ДАН појаси, ќе се одржи на 08.02.2020 година (сабота) во 12.00 часот во спортската сала на ЏК „Пелистер“, улица „Стевче Патако“ бб, Битола.

Пријавите за полагање за 1 КЈУ, 1 и 2 ДАН појаси да се испраќаат во електронска форма (пополнета пријава за полагање за 1 КЈУ или 1 и 2 ДАН појаси) на адресата на ЏФСМ office@judo.org.mk најдоцна до 03.02.2020 година (понеделник).

Уплатата за полагање за овој вид појаси кандидатите треба да ја извршат на жиро сметка на ЏФСМ – најдоцна до 07.02.2020 година (петок).

Напомена: Кандидатите со себе да носат копија од извршената уплата.

Уплата на лице место не е дозволена и нема да бидат примани финансиски средства.

Уплата за полагање за 1 КЈУ е во висина од 1.500 денари

Уплата за полагање за 1 ДАН е во висна од 3.000 денари

Уплата за полагање за 2 ДАН е во висна од 6.000 денари

Секој кандидат уплата може да изврши на:

Назив:  Џудо федерација на Р.С. Македонија  Ж-ска: 300000000567389

Назнака: Дан комисија – за полагање на појаси

 

До клубовите да се препратат и следните документи:

– Програма за полагање на КЈУ појаси (од 5КЈУ до 1КЈУ)

– Програма за полагање на Мајсторски појаси (1 ДАН до 5 ДАН)

– Обрасци за пополнување

-пријави во (word doc.) Верзија за печатење кои согласно член 8 од Правилникот секој кандидат треба да ги пополни и да се пријави.

– Kлубовите се должни пријавите да им ги испечатат и да им ги достават во тврда и електронска верзија.

– Секој кандидат е должен да носи фотокопија од диплома од последниот положен испит за појас.

Во прилог се известувањето и останатите документи за полагањето.

Известување за испит ДАН

Програма за полагање ДАН

Пријава за полагање ДАН

Програма за полагање КЈУ

Пријава за полагање КЈУ

Семинар за обновување на судиски и тренерски лиценци за 2020 година

В сабота и недела , 25 и 26 јануари 2020 г. во Прилеп ќе се одржи семинар за обновување на судиските и тренерските лиценци за тековната година.

Семинарот ќе биде спроведен од страна на членовите на Комисијата за едукација и лиценцирање на тренери и од членовите на Судиската комисија при ЏФСМ. На семинарот како предавач е поканет и интернационалниот џудо судија Светозар Отиќ.

Поканата за пријавување и учество на заинтересираните може да се види овде: ПОКАНА ЗА СЕМИНАР ЗА ОБНОВУВАЊЕ НА СУДИСКИ И ТРЕНЕРСКИ ЛИЦЕНЦИ ЗА 2020 ГОД.

Известување за преодниот рок за регистрација и пререгистрација

Согласно Програмата за работа и врз основа на Правилникот за регистрација на џудо клубови и натпреварувачи,  Регистрациската комисија при Џудо федерацијата испраќа известување до сите џудо клубови, а со цел да се запазат пропишаните одредби од Правилникот.

Преодниот рок за регистрација и пререгистрација е од 8 јануари до 8 февруари. Комисијата известува дека џудистите треба да се пријавуваат согласно членовите 10-12 од Правилникот и воедно напоменува дека ќе бидат регистрирани само оние џудисти за кои се исполнети условите од наведените членови. Тоа значи дека треба уредно да е поднесена документација за регистрирање/пререгистрирање и навреме да се уплатени средства за истото.

Согласно усвоената Програма за работа на Регистрациската комисија, а со цел за подобрување на прегледноста на базата на податоци од ЏФМ, пријавувањето на џудистите треба да се направи и во ексел листата што е доставена подолу. Доколку клубовите имаат прашања во врска со користењето на табелата, Регистрациската комисија стои на располагање.

Списокот (ексел листата) треба да се достави на електронската адреса на Федерацијата најдоцна до 08.02.2020 година.

Натпреварувачките легитимации, копија од извршена уплата за регистрација, полиса за осигурување и сите пропратни документи да се достават до канцеларијата на Федерацијата најдоцна до 08.02.2020 година.

Сите документи пристигнати по дадениот рок нема да бидат разгледувани, се истакнува од Регистрациската комисија.

Ексел табела за регистрација на членови 2020-2021

Пријава за џудисти