Женската кадетска репрезентација освои бронзен медал на меѓународен турнир во Србија

Кадетската репрезентација во машка и женска конкуренција учествуиваше на турнирот „Србија опен 2019“. На 21 и 22 ноември се одржа меѓународен џудо камп, репрезентативците имаа по два џудо тренинга на ден.

На 23 ноември во спортската сала Шумице во Белград се одржа и натпреварот во екипна конкуренција. Машката кадетска репрезентација во конкуренција на 13 екипи беше дел од ждрепката во група А каде покрај нашата репрезентација настапија и екипите на Србија – А, ВГСК Велико градиште и Раковица – Белград.

Во екипна конкуренција во оваа група првото место и влезот во финалето го избори тимот на Србија – А, нашиот состав беше поразен и не успеа да влезе во полуфиналето или во финалето. Женската кадетска репрезентација во конкуренција на четири екипи се закити со бронзениот медал, тие беа поразени од екипите на Србија – А и Србија – Б, а со екипата на Дробета – Турну Северин од Романија резултатот бепе 3:3, по што беше влечена ждрепка и повторно се бореа натпреварувачките во категоријата до 48 кг, каде Теодора Димеска ја победи Стефанија Станицу и нашата екипа победи со резултат 4:3 и го освои бронзениот медал.

 Кадети:

Ангелески Христијан -60 кг.

Цаневски Валентин -66 кг.

Талески Антонио -73 кг.

Глигороски Христијан -81 кг.

Најдоски Јован +81 кг.

Кадетки :

Димеска Теодора -48 кг.

Ема Димитријоска -52 кг.

Марија Талеска -57 кг.

Фејзула Румејса -63 кг.

Колева Благица +70 кг.

Горан Мицкоски, селекторот на јуниорската репрезентација ги предводеше репрезентативците од машката и женската екипа. Тој ни ги пренесе неговите видувања веднаш по настанот: „Нашите репрезентативци со срце ги бранеа нашето знаме и боите на нашата држава, среќен сум што оваа нова генерација во кадетска конкуренција полека но сигурно зачекорува по стапките на повозрасните репрезентативци со кои сум се радувал на многу наши заеднички успеси. Машките беа поразени, но имаа секој по три меча со своите врсници со кои можеби ќе се сретнат на некој европски куп или официјално европско или светско првенство, што за нив е одлично. Женските ги избубија двата меча против Србија – А и Србија – Б, но ја поберија екипата на Дробета- Турну Северин од Романија и се закитија со бронзата. Ќе потенцирам дека бронзениот медел за овие млади девојки ќе значи поттик повеќе за нивната иднина, ова е само уште еден показател дека нив им претстои светла иднина. Ја користам оваа прилика да им честитам и на машката и на женската екипа за борбеноста и успехот кој го направија. На крајот од името на репрезентативците и од мое лично име се заблагодарувам на раководството и на нашата џудо федерација што ни овозможија учество на еден ваков настан од висок ранг“.

Џудо федерацијата на Република Северна Македонија им го честита успехот на овие млади репрезентaтивци и им посакува да освојуваат уште многу медали во иднина.

По повод Светскиот ден на џудото македонските џудисти засадуваа дрвца

Со садење дрвjа во месноста Селце – Манастир, во близина на Прилеп, македонските џудисти го одбележаа 28 Октомври – Светскиот ден на џудото. Оваа активност беше во склоп на глобалната кампања на Интернационалната џудо федерација „Засади дрво“, со што се покажува дека џудото е многу повеќе од спорт.

На централната манифестација, на која освен раководството на Федерацијата, учествуваа спортски работници и џудисти од џудо клубовите „Сеишин“, „Пролетер“, „Прилеп“, „Санкаку“ и „Бишидо“ и претходеше конститутивната седница на Извршниот одбор на Федерацијата.

На седницата беше упатена јавна благодарност до ЈП „Национални шуми“ – Скопје, подружница „Црн бор“ – Прилеп, ЈКП „Комуналец“ – Прилеп, ТППЕ „Прилеп“ и ДОО „Кожувчанка“ кои помогнаа во реализацијата на денешната активност.

Во текот на двата дена од викендот, роденденот на основачот на џудото, Џигоро Кано беше одбележен и во другите градови во Македонија со садење на неколку илјади садници.

Македонските џудисти ќе засадат дрвја во рамки на одбележувањето на Светскиот ден на џудото

Под мотото „Засади дрво“ македонските џудисти и вљубеници во оваа благородна вештина ќе го одбележат Светскиот ден на џудото и роденденот на неговиот основач, Џигоро Кано.

Со оваа повеќе еколошка, од спортска порака уште еднаш се покажува дека џудото е многу повеќе од спорт.

„Планетата земја е во опасност. Научниците и експертите низ целиот свет се согласуваат дека доколку не се направи ништо, нашиот заеднички дом, а со тоа и ние, жителите на оваа земја нема да имаме загарантирана иднина. Токму поради тоа Меѓународната Џудо Федерација сака да придонесе кон заедничкиот напор да се обезбеди подобра иднина за нашите деца“ – се вели во дописот од Џудо федерацијата на Македонија.

Денес, повеќе од 40 милиони луѓе практикуваат џудо низ целиот свет. Ова потенцијално претставува голем број на дрва што можат да се засадат на сите страни од платетата земја. Знаејќи дека годишните времиња не се исти насекаде во исто време, Интернационалната џудо федерација го започнува овој голем проект сега со цел да им овозможи на сите да бидат вклучени. Исто така, свесни за симболичното значење на ваквата програма, ИЏФ ги поканува сите да земат учество и да ги едуцираат најмладите за зачувувањето на нашата животна средина.

Во глобалната прослава на Светскиот ден на џудото се вклучува и нашата федерација. Според предвиденото, в недела, 27. октомври со почеток од 11 часот ќе бидат засадени дрвца на локацијата Селце – Манастир во Прилеп.

Од Федерацијата апелираат до сите џудо клубови, џудисти и вљубеници во џудото да се вклучат во одбележувањето на овој ден со засадување на садници во своето место на живеење.

Владимир Трпаноски е нов претседател на Џудо федерацијата на Македонија

Нов претседател на Џудо федерацијата на Македонија е Владимир Трпаноски, поранешен џудист, долгогодишен активен член на Федерацијата, етаблиран професионалец во деловното окружување и актуелен комерцијален директор на „Витаминка“ АД – Прилеп.

Така решија делегатите на  втората седница на Собранието на Федерацијата што се одржа на 18 септември во Прилеп. На седницата на Собранието, од вкупно 23 редовни членки, учество земаа 39 делегати од 21 џудо клуб. На дневниот ред беа разгледани точки поврзани со тековната работа и функционирање на Федерацијата.

Во рамки на делот од Собранието, поврзано со органите на управување, после прифатената неотповиклива оставка на досегашниот претседател Зегљуљ Реџепи, со мнозинство гласови за нов претседател на Џудо федерацијата на Македонија беше избран Владимир Трпаноски.

Исто така, Собранието донесе одлука за смена на членовите на Извршниот и на Надзорниот одбор и со едногласно избра нови членови на овие органи. За нови членови на Извршниот одбор на Федерацијата се избрани: Авни Реџепи, Благоја Гешоски, Љубен Андријашевиќ, Марјан Колев, Иван Живковски, Ерол Шерифовски, Николче Мариновски, Бошко Вељановски, Сашо Јанакиевски и Горан Антевски, а за нови членови на Надзорниот одбор беа избрани Снежана Патирова, Димче Шипинкаровски и Борче Павлов.

Покрај изборот на новиот состав на органите на Федерацијата, на Собранието беа изгласани и новите потпретседатели, Благоја Гешоски и Горан Антевски.

извор:  Инфокомпас

ПОЛАГАЊЕ ЗА ПОЈАСИ ВО БИТОЛА

Во неделата, 30 јуни 2019 година во Битола во организација на Џудо федерацијата (ДАН КОМИСИЈА) и техничка организација на џудо клубот „Пелистер“ се одржа  полагање за Прв КЈУ кафеав појас и црн појас 1 ДАН.

За полагање пријавени беа вкупно 5 кандидати и тоа три за кафеав појас 1 КЈУ и два за Црн појас 1 ДАН. Во прилог се резултатите од спроведеното полагање:
Кафеав појас 1 КЈУ положен прв циклус (ПОТВРДА):
1. Теодора Ристеска

За кафеав Појас 1 КЈУ (ДИПЛОМА) положиле следните канидати:
1. Михаел Конески
2. Тале Трајковски

За црн Појас 1 ДАН  (ДИПЛОМА) положиле следните кандидати:
1. Христијан Рајков
1. Стефан Бојаџиев

Џудо федерацијата и ДАН комисијата им честитаат на сите кандидати и им посакуваат успех во понатамошната работа во своите клубови.

На полагањето му претходеше состанок на ДАН комисијата на која меѓу другото беше дискутиран предлогот за воспоставување соработка на ДАН комисијата со ДАН комисиите од соседството со цел унапредување на работата на комисијата. Исто така беше разговарано и за Семинар за подготовки за полагање на ДАН и 1 КЈУ, со цел доедукација и укажување на евентуалните недоследности на кандидатите.

 

Младите џудисти од ЏК „Гладијатор“ – Кочани полагаа за појаси

Трисетина млади џудисти од Кочани и Зрновци кои се членови на ЏК „Гладијатор“, беа кандидати на испитното полагање за појас што во саботата, на 18 мај се одржа во салата на ОУ „Синиша Стоилов“ во Зрновци.

Најголем дел од нив беа на училишна возраст и полагаа во неколку категориии, односно од жолт до зелен појас. Тоа значи дека за повеќето полагањето беше првиот чекор во напредувањето и изучувањето на вештините на џудото, а од кочанскиот клуб изразија задоволство од прикажаното и подготвеноста на кандидатите.

– Според новиот правилник на ДАН комисијата при ЏФМ, полагањето ќе го води и надгледува тричлена клупска комисија и плус претставник од ДАН комисијата. Сето ова се прави и организира со цел да се поткрене нивото и квалитетот на самото полагање, односно појасите да бидат според заслуга.  Вакви полагања се организираат двапати годишно, во пролетниот и есенскиот дел, ние ги организираме постојано, а според резултатите што претходно ги имаат покажано децата, како напредуваат на самите тренинзи, зависи и бројката. Еве сега, имаме бројка од над 30 полагачи, рече Вера Шеќероска, претседател на ЏК „Гладијатор“.

Иако во регионот џудото е релативно нова вештина што ја учат младите, сепак со работата на ЏК “Гладијатор“ во изминатите околу три години веќе се постигнати видливи резултати, како со учеството на домашни, така и на турнири во странство. На тој начин успешно се работи на популаризација на оваа спортска дисциплина, која привлекува се поголем број млади луѓе од општините Кочани и Зрновци.

Во Прилеп се одржа првото Државно џудо првенство за ветерани

Првото Државно џудо првенство за ветерани во историјата на Македонија, што се одржа на 14 април во Прилеп, на татамите ги врати македонските џудо ветерани, поранешни шампиони, актуелните тренери и долгогодишни вљубеници во џудото.

Обединeти од желбата заеднички да помогнат во промоцијата на македонското џудо, особено кај помладите, ветераните понудија сосема интересни борби, со многу атрактивни потези, кои дополнително ја зголемија атмосферата во спортската сала „Ристе Ристески – Ричко“ во Прилеп.

Маке Спиркоски беше најдобар во категоријата до 81 килограм, Киро Здравески заврши како втор, додека Диме Џагадуроски беше третопласиран во оваа тежинска категорија. Во категоријата до 90 килограми триумфираше Горан Мицковски, пред Рубин Пеески и Никола Божиновски. Во најтешката категорија, за џудисти над сто килограми, првото место му припадна на Марјан Колев, втор беше Дејан Џикоски, а трет заврши Мето Ангелов.


„Како претседател на натпреваувачката комисија се радувам што еве и оваа старосна категорија доби Државен натпревар и секако во иднина масовноста ќе биде значително зголемена и сакам да го поздравам иницијативниот одбор на ветераните од градот Прилеп на чело со претседателот на одборот Киро Здравески кои со своите активности во изминатиот период придонесоа за реализација на иницијативата и одржување на првото Државно првенство за ветерани“ – рече претседателот на натпреварувачката комисија, Никола Божиновски.

Покрај Државното првенство за ветерани, во Прилеп се одржа и редовното Државно првенство за кадети и кадетки.

Државно џудо првенство за ветерани и ветеранки

Со цел да се обезбеди поголема промоција на џудото, но и да се искористи целото реноме, знаење и искуство на поранешните македонски џудисти како поддршка и мотив на актуелните и идни џудисти, по прв пат во историјата на Македонија ќе се оддржи државно првенство за ветерани и ветеранки.

Согласно пропозициите на турнирот, ветераните не се обврзани да бидат регистрирани за некој клуб, но задолжително треба да ги достават своите пријави на следната е-маил адреса: office@judo.org.mk при што ќе ги наведат следните генералии:
– име
– презиме
– датум на раѓање
– категорија килограми

Првенството ќе биде од пријателски карактер, а со оглед на фактот што истото не е предвидено во бодовната листа на Џудо федерацијата на Македонија нема да им предизвика никаква штета на било кој од клубовите. Сепак, и покрај пријателскиот карактер, лекарскиот преглед, како и полиса за осигурување од спортски повреди ќе бидат задолжителни за сите учесници.

Право на учество имаат и сите тренери, спортски работници и рекреативци.

Турнирот на кој свој настап, но во официјалниот дел ќе имаат и кадетите и кадетките, ќе се одржи на 14. април, од 10,30 часот, во спортската сала при средното општинско училиште „Ристе Ристески – Ричко“ во Прилеп.

Исто така, еден ден порано, на 13. април во Прилеп ќе се одржи седница на собранието на Џудо федерацијата на Македонија.

ПРОПОЗИЦИИ ЗА ДРЖАВНОТО ПРВЕНСТВО ЗА ВЕТЕРАНИ-КИ 2019

ПРОПОЗИЦИИ ЗА ДРЖАВНОТО ПРВЕНСТВО ЗА КАДЕТИ-КИ 2019

Пријава за кадетки

Пријава за кадети

Дневен ред на седницата на Собранието на Џудо федерацијата на Македонија

Државно првенство за пионери/пионерки и сениори/сениорки 2019

ПРОПОЗИЦИИ ЗА ДРЖАВНО ПРВЕНСТВО ЗА ПИОНЕРИ/КИ

Пријава за пионери

Пријава за пионерки

Изјава на родител

Изјава на клуб

ПРОПОЗИЦИИ ЗА ДРЖАВНО ПРВЕНСТВО ЗА СЕНИОРИ/КИ

Пријава за сениори – поединечно

Пријава за сениорки – поединечно